🙏

श्रीज्ञानेश्वरस्तोत्रम्

Shrijnaneshvara Stotram

स्तोत्र · Sanskrit · ⏱ 1 min

अन्य नाम · Also known as श्रीज्ञानेश्वरस्तोत्रम्

Sanskrit text from Sanskrit Wikisource.

सद्गुरुं सच्चिदानन्दं केवलं करुणाकरम् ।
ज्ञानयोगेश्वरं वन्दे ज्ञानदेवं पुनः पुनः ॥ १ ॥

वाङ्मनोबुद्धिभावानामतीतं परमेश्वरम् ।
निष्कलं सगुणं वन्दे ज्ञानदेवं पुनः पुनः ॥ २ ॥

निर्मलं सदयं शांतं प्रणताखिलमङ्लम् ।
ज्ञानैकरूपिणं वन्दे ज्ञानदेवं पुनः पुनः ॥ ३ ॥

भक्तिकल्पतरोर्मूलं बीजं साधनसम्पदः ।
सर्वलोकहितं वन्दे ज्ञानदेवं पुनः पुनः ॥ ४ ॥

आविर्भूतो हरि: साक्षात् पावने गौतमीतटे ।
रुपेण यस्य तं वन्दे ज्ञानदेवं पुनः पुनः ॥ ५ ॥

निवृत्तिमार्गिणो मुक्ति: सोपानसुलभा कृता ।
कृपया यस्य तं वन्दे ज्ञानदेवं पुनः पुनः ॥ ६ ॥

ज्ञानं भक्तिरसं यस्य यद्भक्तिर्ज्ञानभास्वती ।
तमद्वैतपरं वन्दे ज्ञानदेवं पुनः पुनः ॥ ७ ॥

दृष्टि: कृपावती यस्य नित्यं पीयूषवर्षिणी
नताश्रयांघ्रिं तं वन्दे ज्ञानदेवं पुनः पुनः ॥ ८ ॥

सुधाविजयिनी तापशमनी लोकपावनी
भारती यस्य तं वन्दे ज्ञानदेवं पुनः पुनः ॥ ९ ॥

भावार्थदीपिका यस्य अनुभवामृतजीवनी
तं बुद्धिभास्करं वन्दे ज्ञानदेवं पुनः पुनः ॥ १० ॥

शरदिन्दुमनोज्ञाङ्गं कमलायतलोचनम् ।
पद्मासनस्थितं वन्दे ज्ञानदेवं पुनः पुनः ॥ ११ ॥

प्रसन्नं परमोदारं वरदं सुस्मिताननम् ।
आलन्दिवल्लभं वन्दे ज्ञानदेवं पुनः पुनः ॥ १२ ॥

सुहृदं सर्वभूतानां मातरं पितरं प्रभूम् ।
प्रेमलं वत्सलं वन्दे ज्ञानदेवं पुनः पुनः ॥ १३ ॥

बुद्धिनद्या: शरत्कालं प्रग्रहं चित्तवाजिनः
पापतापहरं वन्दे ज्ञानदेवं पुनः पुनः ॥ १४ ॥

हे तात ! भवतैवोक्तं शिशोर्माता स्वयं हिता ।
चित्तवृत्ते: समाधानं बुद्धे: स्थैर्यं सदाsस्तु मे ॥ १५ ॥

स्रोत · Source

Sanskrit Wikisource, page "श्रीज्ञानेश्वरस्तोत्रम्", revision 33023.
Sanskrit Wikisource · Creative Commons BY-SA
Text from Sanskrit Wikisource (sa.wikisource.org), used under CC BY-SA 4.0. Page history and contributors are linked from the source URL recorded with each text.

#wikisource